Saulis kolni

Saulis kolni (latvīšu: Sauleskalns) irā kaupru puors Latgolys dīnavydūs, Latgolys augstainē, Kruoslovys nūvoda Kumbuļa pogostā, Kruoslovys—Dagdys ceļa reitu pusē, pi Dreidža azara. Vīna nu senejūs latgaļu pošsvareiguokūs svātvītu. Nūmīļuots turizma objekts (tok padūmu laikā panycynuots i itamā šaļtī aplaists).

Augstuokuos nu diveju viersyuņu vyscaureigais augstums — 211 m augšuok jiuru leidzīņa, samiereigais augstums (augšuok apleicīnis) — 60 m. Nu Saulis kolnu viersyuņu var īsavērt vaira kai 20 apleicejūs azaru (Dreidzs, Jodazars, Guļbeits, Aulejs, Gauslis, Plauds, Zosna, Sivers, Kaušs, Pūrs, Dybyns, Lejs, Cārmyns, Iļzeits, Zyrga azars, Ārdavs i ct.).

Pasauka

Saulis kolnu apleicīnis vacūs audžu dzeivuotuoji runoj ap "Saulis kolnim" (divejim), i dobā radzamys obadivejis viersyunis, tok oficialajā literaturā latvīšu volūdā klaideigai īsaguojuse pasauka vīnskaitā (Sauleskalns).

Saulis kolni kai vīna nu golvonūs senejūs latgaļu svātvītu īīt objektu kompleksā ar vērtini poguoniskai kulta vītai soveigu pasauku — Saulis kolni, Dīva duorzs, Jodazars, Valnazars, Saulis azars i ct.