Konstaņtinovys pogosts

Konstaņtinovys pogosts irā Dagdys nūvoda teritoriskais padalīņs Latgolā. Pogostā dora tautys noms, biblioteka, feļčeru punkts. Konstaņtinovā dora pamatškola, a Aleksandrovā specialuo internatškola.

Konstaņtinovys pogosts
Nūvods:	Dagdys nūvods
Centrys:	Konstaņtinova
Pluots:	79,1 km2
Dzeivuotuoju sk. (2010):	601
Bīzeiba:	7.6 dz./km2
Īstateits:	1971 godā

Viesture

Viesturiskai Konstaņtinovys pogosta teritorejā da 1920 zemis reformai beja Daugpiļs apleiciņa Aleksandrovys, Ignatovys, Konstaņtinovys, Magnusovys i Sivergola muiža. 1971 godā Kruoslovys rajonā saškir Aulejis, Dagdys i Ignatovys sovetu saimisteibys "Iskra" zemis, īstotūt Iskrys solu. 1979 god`a Iskrys solai davīnova daļu likvidātuos Jaunokrys solys. 1990 godā solu reorganizej kai pogostu i tymā pošā godā pasauc par Konstaņtinovys pogostu. 2009 godā kai administrativu teritoreju pogostu daškir Dagdys nūvodam.

Rūbeži

Konstaņtinovys pogosts tur rūbežu ar:

• Dagdys nūvoda Dagdys pogostu, Ondrupinis pogostu i Osyuna pogostu;
• Kruoslovys nūvoda Aulejis pogostu, Pūstinis pogostu i Skaista pogostu.

Doba

Konstaņtinovys pogosts atsarūn Latgolys augstainis Dagdys kauprainē, zeme viļnaina. Pogosta pluots 79,1 km², nu tuo solsaimesteibai lītojamuo zeme 4225,1 dekteru, meži 2776,9 dekteru i kriumuoji 106,8 dekteru. Pogostā 1999 godā īstateits dobys nūlīgtiņs "Ojuota azars", taipoš lela daļa Sivera pussolys irā sorgojamuo dobys teritoreja.

Iudini

Upis:

• Dzagyuze
• Mozuo Dubna
• Nartišu gruovs
• Noviku gruovs

Iudiņtveris:

• Kupra azars - 7,5 dekteru
• Lubuoneņš
• Ojuots - pošleluo dzilīne 40,5 m (6 pa dzilīnei Latvejā)
• Prudiņka
• Saldu azars - 1,6 dekteru
• Sylazars - 6 dekteri
• Škierzlots

Zeimeigu pūru i peisu pogostā navā.

Dzeivuotuoji

Konstaņtinovys pogostā dzeivoj 601 ļauds, nu jū 62,2% latvīšu, 23,6% krīvu i 8,3% cytu tauteibu (boltkrīvu, puoļu i cytu). Lelums pogosta dzeivuotuoju katuoli. Dora napalela katuoļu parapeja, tok ļauds pīdartaipoš i Dagdys ci Kruoslovys katuoļu bazneicom.

Solys

Konstaņtinovys pogosta ļauds dzeivoj 31 soluos. Pošu leluos solys - Konstaņtinova, Aleksandrova, Eisaki, Sivergols, Nartiši.

Saimisteiba

Transports i saiteibys

Pogosta teritoreju škārsoj vaļsteibys zeimebys ceļš Kruoslova-Dagda (P61), taipoš sative nūteik pa nazcik vītejuos zeimeibys celim. Dzeļžaceļa linejis pogostā navā.

Konstaņtinovys pogosta teritoreju apkalpoj vīna posta atdale "Kriumuoji" Konstaņtinovys solā (LV-5680).