Piergrubs
Piergrubs (lītaunīku: Pergrubijus) — augļeibys, povosora i augu dīvs pryušu mitologejā. 16 godu simteņa gruomotā „Sudovu gruomoteņa” raksteits, ka nu Piergruba asūt bejusi atkareiga zuoļu i lopu augšona. Jona Bretkuna hronikā tys iraid mynāts kai zemis augu dīvs, bet Jons Maļeckis i Jons Lasickis sauce tū por povosora dīvu.[1] Piergrubs tīk pretstateits meža dīvam Puškaišam. Bretkūna sorokstā tys mynāts uzraiz aiz Ūkapyrma. Vysdreižuok toudeļ, ka Piergrubam tyka veļteitys godskuortys pyrmuos sviņeibys. Tojuos iz lauka tyka izvasts orkls i slavynuots Piergrubs por tū, ka tys aizdziņs zīmu i devs cylvākim zuoļi i lopys. Jam tyka lyugta loba roža i nazuoļu izņeidiešona. Piec to vīnmār beja ļela dzīduošona, ola dzeršona i teļa, vuškys, vucina vai gaiļa upuriešona.