Ingrida Tārauda

Ingrida Tārauda (latvīšu: Ingrida Tērauda; dzymuse 1971 goda juņa 30 dīnā Rēznis rajona (niule — Rēznis nūvods) Drycānu pogosta Kuzmu solā) — latgalīšu ailineica, lirike. Davuse zeimeigu īlicīni latgalīšu lirikys raisteibā, siņtezādama latgalīšu literarū tradiceju ar myuslaiceigom izsaceibys formom.

Biografeja

Vuicejusēs Drycānu vydškolā, studiejuse Daugpiļs Universitetā filologeju. Darejuse Vacstrūžānu pamatškolā, Cyskodu vydsškolā, Cyskodu bārnunomā, Gaujīnis vydsškolā. Radeigajai izaugsmei ītaku darejs Oskars Seiksts, Valentins Lukaševics i cyti juos audzis jaunī latgalīšu literati. Latvejis Rakstinīku savīneibys bīdre nu 2007 gods.

Literaruo darbeiba

Pyrmuo publikaceja – dzeivuļs baļtīšu volūdā laikrokstā Latvijas Jaunatne 1987 godā. Pyrmuo leluokuo publikaceja (latgalīšu volūdā) — jaunūs autoru kūplasīnī Pagrauda (1999). Ailis taipoš publicātys laikagruomotā Tāvu zemes kalendars, rokstu lasīnī Olūts, aļmanahūs Rēzekne i Luna, latgalīšu poezejis antologejuos (Latgalīšu dzejas antologija (2001, sast. V. Valeinis), i Susātivs (2008, sast. I. Šuplinska), škārsteikla laikrokstā LaKuGa i cytur. Sovi lirikys lasīni - Vīgla byušonys ironeja (2000) i Izdadzynuota sirds (2001).

Poezejai soveigi pasauļa dazinis paradoksi, iņtimūs puordzeivuojumu atspeidīni. Izsaceiba dobyska i breiva, liriskuo varūne pasamona dūt i jimt vīnulaik - atsaļaudama runuot ap sovu dobyskū sīvīteibu.

• Gruomotys:
  • Vīgla byušonys ironeja (2000)
  • Izdadzynuota sirds (2001)
  • Boltais šokolads (2012)

• Svareiguokys publikacejis kūplasīņūs
  • Starp sliekšņiem un jumtiem (sast. I. Atpile-Jugane 2002)
  • Pie–la–vī-ties: Rēzeknes augstskolas jauno autoru krājums (sast. I. Šuplinska, 2003)
  • Saulis spaiti iz spīgeļu. Лучи по зеркалам (latgalīšu i krīvu volūdā (sast. I. Magazeinis, F. Osina, 2007).
  • Susātivs: myusdīnu latgalīšu dzejis antologeja (sast. I. Šuplinska, 2008)

Uorejuos nūruodis

• Ingrida Tārauda