Eņdemizmys

Eņdemizmys (nu greku: ἔνδημος- (endēmos) — 'vītejais') ira pasaruodīņs, kod auguoju ci dzeivinīku škira, ciļts voi dzimte sateikama viņ aprūbežuotā geografiskā apgabalī i nasateikama nikur cytur iz Zemis viersa.

Latimereja aba celakants — paleoendemiska plaukstpuru zyvu škira, dzeivojūša viņ sūpluok Komoru jiursolu i Madagaskarys

Daudzi eņdemisku škiru var atrast geografiskai ci ekologiskai atškiertūs apvydūs, pīv., jiursoluos, pa kolnim, dziļūs azarūs. Regioni ar augstu eņdemizmu — Havaju jiursolys, Madagaskara, Jaunkaledoneja, Australeja, Jaunzelaņdeja, Baikala azars. Atškir paleoeņdemus — škirys i ciļts, kurūs areali šaurynojās, i neoeņdemus — jaunys škirys, ciļts i tt., kurys vēļ naaizspēja pasaplateit.

Eņdemizma preteimeiba — kosmopolitizmys, kod škira sateikama gondreiž vysur iz Zemis viersa.